ᐃᑦᑕᕐᓂᓴᓕᕆᓂᖅ

ᐃᓂᑦᑎᐊᕙᐅᔪᖅ ᐱᒻᒪᕆᐅᔪᓂᑦ ᐱᒋᐊᕐᕕᒋᒋᐊᖓ ᖃᓄᐃᓕᐅᕐᓂᕆᔭᑦᑎᓐᓄᑦ ᐊᑦᑐᐃᓂᖃᓕᖅᑎᑦᑎᑐᐃᓇᓲᖑᖏᑦᑐᖅ ᖃᐅᔨᓴᕐᓂᕐᒥ, ᐃᑦᑕᕐᓂᓴᓕᕆᓂᕐᒥ, ᑕᕐᕆᔮᒃᓴᓕᕆᓂᕐᒥ, ᐊᒻᒪᓗ ᐱᓕᒋᐊᕐᓂᕐᒥ. ᑕᐃᒫᖑᓂᖓᓄᓪᓕ, ᐊᑕᖏᖅᑐᑏᑦ ᑕᒃᑯᐊ ᐱᖃᓯᐅᑎᓯᒪᕗᑦ ᐊᒻᒪᓗ ᐊᑦᑐᐃᓂᖃᓪᓚᕆᑦᑐᑏᑦ ᐱᓕᕆᐊᕆᓲᓕᒪᐸᓗᑦᑎᒎᖅᑐᓂᑦ.

ᐃᑦᑕᕐᒥ ᐱᓕᕆᐊᖃᓲᖑᕗᒍ ᐊᔾᔨᒌᖏᑦᑐᑕᓂᑦ ᐱᓕᕆᐊᓂᑦ ᐅᐱᒍᓲᑎᓕᖕᓂᑦ ᐊᒻᒪᓗ ᐊᑐᐃᓐᓇᖃᖅᑐᓂᑦ ᐃᓄᐃᑦ ᐱᖅᑯᓯᖃᒍᑦ ᐃᑦᑕᕐᓂᓴᓕᕆᓂᕐᒥ. ᐊᒥᓲᑦ ᖃᐅᔨᓴᕐᑕᒥᓂᑦ ᐊᒻᒪᓗ ᑕᕐᕆᔮᒃᓴᓕᕆᓂᕐᒧ ᐱᓕᕆᐊᑦ ᐱᓕᕆᐊᕆᓯᒪᓕᖅᑕᕗᑦ, ᐱᖃᓯᐅᑎᓪᓗᒋᑦ ᐱᓕᕆᖃᑎᖃᕐᕕᒋᓯᒪᓕᖅᑕᕗᑦ ᑲᑐᔾᔨᖃᑎᒌᓂᑦ ᓱᕐᓗ ᐃᓕᓴᖅᓯᕕᒃ ᐊᒻᒪᓗ ᐱᖅᑯᓯᓕᕆᕕᒃ ᐊᑦᑐᐊᓂᓕᓐᓇᑦ ᐃᑦᑕᕐᓂᓴᓕᕆᓂᕐᒧ ᖃᓄᐃᓕᐅᕐᓂᐅᔪᓂᑦ.

ᐊᕐᕋᒍᒐᓴᐅᓕᖅᑐᓂᑦ ᕿᒪᒃᓯᒪᓕᖅᑕᑎᖕᓂ ᐊᒥᓱᓂᑦ ᓄᐊᑦᑎᓯᒪᓕᖅᐳᒍ ᑕᕐᕆᔮᒃᓴᑎᒍᑦ ᓴᖅᑭᔭᕈᓐᓇᖅᑐᓂᑦ ᐊᑦᑐᐃᓂᓕᖕᓂ ᐃᑦᑕᕐᓂᓴᓕᕆᓂᕐᒥ ᐊᔾᔨᒌᖏᑦᑐᑕᓂᑦ ᐱᓕᕆᓂᒃᑰᖅᑐᓂᑦ ᐊᐱᖅᓱᕐᓂᒃᑯᑦ ᐃᓐᓇᑐᖃᕐᓂᑦ, ᑕᕐᕆᔮᒃᓴᓕᐅᕐᓂᖅ ᐊᒻᒪᓗ ᐊᔾᔨᓕᐅᕆᓂᖅ ᓄᓇᒋᔭᑦᑎᖕᓂ, ᑕᕐᕆᔮᒃᓴᓕᐅᕐᓂᖅᑎᒍᑦ ᓄᓇᒥᑦ ᖃᓄᐃᓕᐅᖅᑕᕐᓂᑦ ᐊᒻᒪᓗ ᓄᓇᓕᐅᑉ ᓯᓚᑕᒍᖅᑐᓂᑦ ᐊᐅᓪᓚᖅᓯᒪᓂᕐᓂ, ᐊᕐᕋᒍᑕᒫᖅᑕᖅᑐᓂᑦ ᐱᖅᑯᓯᑐᖃᖅᑎᒍᑦ ᐅᐱᙱᔭᖅᑐᕐᓂᐅᓲᓂᑦ. ᐃᓚᖏᓪᓕ ᑕᕐᕆᔮᒃᓴᓕᐅᖃᑦᑕᖅᑕᒥᓂᖅᐳ ᑕᑯᒃᓴᐅᔪᑦ ᐊᑐᐃᓐᓇᐅᓪᓗᑎᑦ ᕿᓪᓕᖅᑐᑎᒍᑦ ᑕᕐᕆᔮᒃᓴᒃᑯᑦ ᐊᒻᒪᓗ ᓴᖅᑮᓯᒪᒋᓪᓗᑕ ᖃᕋᓴᐅᔭᒃᑯᑦ ᑐᒃᑕᕐᓗᓂ ᖃᐅᔨᓇᓱᑏᑦ ᐊᑦᑐᐊᓂᓕᑦ ᐃᓄᐃᑦ ᕿᒻᒥᖏᓂᑦ. ᓄᑖᖑᓪᓗᓂ ᐱᓕᕆᐊᕗᑦ ᑲᖏᖅᑐᒑᐱᖕᒥ ᖃᐅᔨᒪᔮᕆᔭᕐᓂ ᓄᓇᙳᐊᓕᕐᓂᕐᒥ ᑲᑎᖅᓱᐃᓯᒪᕗᒍᑦ ᐃᑦᑕᕐᓂᓴᓕᕆᑐᐃᕐᓂᐅᖏᑦᑐᒥᑦ ᐊᒻᒪᓗ ᑕᕐᕆᔮᒃᓴᑐᐊᖑᖏᑦᑐᓂᑦ ᐱᓕᕆᐊᒃᓴᓂᑦ. ᐱᓕᕆᐊᖃᖃᑦᑕᖅᓯᒪᒋᕗᒍᑦ ᐃᓚᒌᑦ ᓇᒥᓐᓂᖏᓄᑦ ᓇᓗᓇᐃᒃᑯᑎᒥᑦ ᖃᐅᔨᓴᕐᓂᕐᒥ, ᓄᐊᑦᑎᓪᓗᑕᓗ ᐅᐊᑦᑎᐊᕈᕐᓇᓴᓂᑦ ᐊᔾᔨᙳᐊᓂᑦ ᓄᓇᒋᔭᑦᑕ ᖃᓂᒋᔭᓂᙶᖅᓯᒪᔪᓂᑦ, ᐊᒻᒪᓗ ᓄᐊᑦᑎᓯᒪᒋᓪᓗᑕ ᐃᓄᖕᓄ ᑎᑎᖅᑐᒐᖅᑕᐅᖃᑦᑕᖅᑐᒥᓂᕐᓂ ᓄᓇᓕᖕᒥᐅᑕᓄᑦ ᓴᓇᔭᐅᖃᑦᑕᖅᑐᒥᓂᕐᓂᑦ. ᓴᖅᑭᑦᑎᒋᐊᕐᓂᖅ ᐊᒻᒪᓗ ᓴᙱᓕᖅᑎᑦᑎᒋᐊᕐᓂᖅ ᐃᓄᐃᑦ ᐅᖃᐅᓯᖓᓂᑦ ᐱᒻᒪᕆᐅᒋᔭᕗᑦ ᐊᒻᒪᓗ ᐱᓕᕆᐊᖃᖃᑦᑕᖅᓯᒪᓪᓗᑕ ᐊᒥᓲᔪᓂᑦ ᐱᓕᕆᐊᓂᑦ ᐊᑦᑐᐃᓂᓕᖕᓂᑦ ᐃᓄᒃᑎᑐᑦ, ᓱᕐᓗᖃᐃ ᐃᓐᓇᑐᖃᕐᓂᑦ ᐃᓕᓐᓂᐊᕐᕕᖕᒥ ᖁᕙᓯᓐᓕᖕᓄᑦ ᐳᓚᕆᐊᖃᑦᑕᕐᓂᖏ ᒥᑭᓛᓂᑦ ᖁᕙᓯᓛᓄᑦ ᐃᓕᓐᓂᐊᖅᑎᐅᔪᓄᑦ ᐃᓕᓐᓂᐊᖅᑎᑦᑎᓪᓗᑕ ᐃᓄᒃᑎᑐᑦ ᑎᑎᕋᐅᓯᓕᕆᓂᕐᒥ, ᑎᑭᐅᑎᑎᑦᑐᑎᒍ ᓄᑖᓄᑦ ᐱᓕᕆᐊᓄᑦ ᐃᓕᓴᖅᓯᕕᒃᑯᑎᒍᖅᑐᓂᑦ ᓴᖅᑭᒋᐊᕐᓂᓕᖕᓄᑦ ᐃᓄᐃᑦ ᐅᖃᐅᓯᖓᑕ ᐊᑐᕐᓂᓕᖕᓂᑦ.